Ls respunsables pula raça mirandesa prepórun-se para ambestir quatro milhones d'ouros na spanson dua de las eimaiges de marca de l Nordiste Stransmuntano que quier assumir-se cumo alternatiba a la crise na agricultura.
"Crecer" ye la palabra d'orde nun mercado adonde la percura supera la capacidade de repuosta de l produtores de chicha Mirandesa, un de l poucos produtos que resistiu, ne ls redadeiros anhos, a la queda acentuada de l précio pago al produtor. Anquanto outras chichas i produtos cumo l cereal ó l'azeite sofrírun quebras de rendimento lebando agricultores l'abandonáren las produçones, a mirandesa mantebe ls précios. Las cuntas, hoije rebeladas a la Lusa, son de Fernando Sousa, secretairo-técnico de la raça, que cunsidra que a mirandesa «ye l'alternatiba» i que la crise puode ser ua jinela d'ouportunidades. L respunsable acradita ser possible atrair agricultores que stan a perder rentabilidade noutras atibidades i la raça mirandesa, que durante geraçones funcionou cumo cumplemento a la laboura, passar a ser un suporte de l'atibidade agrícola. Ls nuobos zafios staran an debate, sábado, an Miranda de l Douro, nun ancontro para assinalar trés anibersários de la raça outótone stransmuntana certificada i protegida pula Ounion Ouropeia.
La raça mirandesa celebra l centenário de la publicaçon de l decreto-lei qu'anstituiu l registo de çcendéncia, las bodas d'ouro de l Libro Genealógico i ls binte anhos de l'associaçon de criadores. L solar de la raça ye l Nordiste Stransmuntano, adonde se ancontra a maior parte de l 567 produtores, sendo propósito de l'associaçon alarga-lo de Bergáncia la Ébora. L númaro de produtores quedou reduzido a un terço an pouco mais dua década, mas l'afetabo mantebe-se, inda assi, i las sploraçones crecírun an númaro d'animales.Ls produtores recíben un susídio de la Ounion Ouropeia que puode chegar als 600 ouros anuales por cabeça. La benda dun bitelo puode render 800 ouros.
Al mercado chegan 360 toneladas de chicha mirandesa por anho, l'eiquibalente al cunsumo anual de chicha de la cidade de Bergáncia.Las dieç raças outótones de l paíç representan solo cinco por ciento de l cunsumo nacional de chicha. Un "nicho" que se çtingue pula qualidade i que Fernando Sousa cumpara a ua "micro ampresa" cujo belume de negócios total çconhece, mas ye rentable. Solo l'agrupamento mobimenta dous milhones d'ouros/anho.La Posta a la Mirandesa ye l pedaço de chicha mais coincido de la region, la que debiran juntar-se nuobos produtos na ounidade andustrial porjetada hai cinco anhos para Bimioso. Fernando Sousa stá cumbencido de que l porjeto bai finalmente abançar, aguardando solo l'aprobaçon dua candidatura al Porgrama de Zambolbimento Rural (PRODER), que deberá financiar 40 por ciento de l quatro milhones neçairos pa l porjeto.Ls anchidos de chicha de baca son ua de las apostas de l produtores que quieren agora lançar-se ne l mercado de la sportaçon, ampeçando por Paris, adonde un çtribuidor yá faç chegar a mirandesa. La capital francesa ye la localizaçon pensada pa la purmeira loija cuncetual inda an fase de porjeto, quier será un spácio de degustaçon i aprossimaçon als cunsumidores.
Sem comentários:
Enviar um comentário