21 de Setembre a 23 de Outubre - Çtrito de Bergáncia
Un milhon i meio d'ouros puoden benir a ser ambestidos nas zonas rurales de l quatro cunceilhos de la raia nordestina atrabeç de l PRODER, Porgrama de Zambolbimento Rural.
Las candidaturas al sub-porgrama trés ban ampeçar-se agora i la geston stá a cargo de la CORANE, Associaçon de Zambolbimento de l Cunceilhos de la Raia Nordestina, qu'angloba Bergáncia, Miranda de l Douro, Bimioso i Binhales.
Agricultura, micro-ampresas, atibidades turísticas i de lazer, património i apoio social son las cinco medidas cuntempladas.
Anstituiçones, antidades pribadas i outarquias puoden apersentar candidaturas.
La bertente social stá a ser ancarada cun algua spetatiba pula associaçon, yá que ye la purmeira beç que surge un porgrama para apoiar este setor na ária rural, adonde estas necidades son mui sentidas.
Manuela Morales, técnica de la CORANE, adianta que “centros de cumbíbio, creches, serbícios de salude, apoio domiciliário” son eisemplos de porjetos que puoden beneficiar de financiamento. “Puode-se financiar la custruçon, l'eiquipamento ó até l porjeto na totalidade” acrescenta.
Até agora, a maior parte de l porjetos i antençones de candidatura apersentados son de la ária de l turismo rural.
Mas, al to yá hai mais de meia ciento d'antressados. “Yá ne ls cuntatórun bastantes pessonas, quier na sede, por telifone i carta eiletrónica, yá fúrun mais de 50 pessonas” rebela la respunsable.
Las candidaturas decorren de 21 de Setembre a 23 de Outubre.
Mas las ouportunidades nun se sgotan eiqui.
“Para este abiso de candidatura ye un més, mas daqui la trés meses bolta a abrir outra fase cun outra dotaçon financeira” splica Francisco Torron, outro técnico de la CORANE. “Esto nun ancerra agora porque l porgrama bai até 2013” salienta.
Para melhor sclarecer ls antressados subre este sub-porgrama de l PRODER, la CORANE stá a rializar sessones públicas ne ls quatro cunceilhos abrangidos pula associaçon
Founte. Rádio Brigantia
Sem comentários:
Enviar um comentário