Besitas al Centro Stórico, atuaçones de Pauliteiros i passeios de camboio assinalórun Die Mundial de l Turismo

Miranda de l Douro aposta ne l Turismo

Las tradiçones de Miranda de l Douro stubírun bien persentes nas comemoraçones de l Die Mundial de l Turismo, que decorrírun ne l passado sábado, naqueilha cidade.

Anquanto ls grupos de Pauliteiros animában ls Centro Stórico, ls turistas cuncentrában-se na Casa de la Cultura para ambarcar nua biaige de camboio eilétrico, que yá se transformou an mais un atratibo de Miranda de l Douro.

Nua biaige de cerca de 20 minutos ye possible coincer ls percipales motibos d'antresse de la localidade, siempre al sonido de música tradicional an léngua mirandesa.

Stória, museu, património, paisaiges, tradiçones, etnografie, gastronomie, raças outótones, “lhéngua” i artesanato son alguns de l'atributos dun cunceilho qu'atrai pertueses i strangeiros (eissencialmente spanholes) an busca de las raízes dun pobo que faç queston de preserbar la sue eidantidade. L turismo, de resto, ye ua de las percipales apostas de la Cámara Municipal de Miranda de l Douro, que ten bários porjetos an curso para dinamizar l setor.

Passado la requalificaçon de l riu Fresno, l'outarquia prepara-se para criar ua outra zona de lazer d'eiceléncia: la Quinta Pedagógica/Parque de las Arribas. I, an parcerie cula tutela, stá an fase de porjeto la fetura Puorta de l Parque Natural de l Douro Anternacional.
Mas, l'obras ne l Fresno nun ban quedar por eiqui, stando yá prebista l'arborizaçon de las costielhas, l'aquisiçon de canoas, gaibotas i barcos, la sinalizaçon de l parque, la criaçon dun centro d'anterpretaçon, bien cumo la custruçon dun bibeiro. Segundo l bice-persidente de l'outarquia, Américo Tomé, outra de las prioridades ye la balorizaçon de l Mundo Rural i de l produtos de qualidade de l cunceilho, atrabeç de la criaçon dun centro de recolha de produtos regionales.

Aliás, nun fui a a toa que l'eidilidade criou un Puosto de Turismo i de Benda de Produtos Regionales, bien acerca de la frunteira.

Fonte: Jornal Nordeste, 29-09-2009 (versão original)