300 diplomas çtribuídos an Miranda
Depuis de terminado l porcesso Reconhecimento Balorizaçon i Certificado de Cumpeténcias (RBCC), ne l ámbito de l Porgrama Nuobas Ouportunidades, l Centro Nuobas Ouportunidades de l Município de Miranda de l Douro (CNOMD), antregou ls diplomas que cunfíren als cerca de 300 formandos anscritos halbelitaçones pa l nible básico i secundário. La cerimónia d'antrega de l certificados decorreu, an ambiente de fiesta, ne l Pabilhon Multiusos de Miranda de l Douro. Ne l total fúrun antregues 183 diplomas de nible Básico i 115 de nible Secundário.L Porgrama Nuobas Ouportunidades ye ua nuoba forma de daprender, de balorizaçon pessonal de quien ten un baixo nible de scolarizaçon i de qualificaçon profissional i, arriba de todo, dá la possibilidade a la populaçon de ber reconhecidas las cumpeténcias adquiridas al longo de la bida. Trata-se dun mecanismo de reforço de a outo-stima de la populaçon.
L'aposta ne l reconhecimento de l saberes, de las speriéncias de bida, de l saber ampírico tamien ye amportante pa l zambolbimento de l saber científico i custitui la grande nobidade deste porgrama. La populaçon de l cunceilhos de Miranda de l Douro, Bimioso i Mogadouro, quedou mais anriquecida. Ls formandos senten-se, agora, mais antegrados i daprendírun a coincer-se melhor la si própios, nun porcesso de RBCC, que balorizou i respeitou l perfil andibidual de cada aluno. Ye de rialçar que to l porcesso se rializou nas própias localidades, eibitando la çlocaçon de l formandos. Segundo l diretor de l CNOMD, António Carçon, hai cerca de 1700 formandos a frequentar l centro nuobas ouportunidades, stando yá certificados mais de 900 pessonas.
“ Speramos que cada un puoda ber las sues qualificaçones reconhecidas ne ls sous locales de trabalho. Quedamos sastifeitos porque son formadas pessonas, nun solo de l cunceilho de Miranda de l Douro, mas, eigualmente, de l cunceilhos bezinos de Mogadouro i Bimioso”, cuncluiu l respunsable.
Sem comentários:
Enviar um comentário