“Cumprimos l que prometemos”

L bice-persidente de la Cámara Municipal de Miranda de l Douro, Américo Tomé, abança nestas eileiçones de cuncéncia tranquila. “Cumprimos an mais de 90 por ciento todo l que prometemos”, assegura l candidato. Nun fússen ls atrasos ne l QREN i porjetos cumo la Quinta Pedagógica yá starien an andamento, garante l cabeça de lista de l PSD.

Jornal Nordiste (JN) - Que balanço faç destes anhos de mandato? Qu'obras cunsidra mais amblemáticas?

Américo Tomé (AT) - Cunfirmando l trabalho de l'anhos anteriores, cun ua cámara credible, cul senó de l'atraso de l QREN, fui un anho de pleno ambestimento, de promoçon i de balorizaçon de l nuosso Cunceilho.

A l'eimaige de l mandatos anteriores, fui un período dinámico cula rializaçon afetaba de porjetos que prometemos als mirandeses. Sendo un Cunceilho cun poucos recursos financeiros, cumprimos an mais de 90 por ciento todo l que prometemos, cuncretamente: la recuperaçon ourbanística de l Riu Fresno, l Pabilhon Multiusos cun mais de 600m2, Mini-auditório i la sede de la Associaçon Comercial, anstalamos l relbado sintético ne l campo de Futebol de Santa Luzia, recinto de Fiestas i Festibal Antercéltico de Sendin ne l parque de las Eiras, regeneraçon ourbana ne l Centro stórico, anstalaçon dun Centro Nuobas Ouportunidades an Miranda de l Douro, solo sediado nun Município an to l Nordiste Stransmuntano.

Dou-se cuntinidade als arranjos ourbanísticos an todas las aldés de l cunceilho, fazirun-se transferéncias de capital / anho para todas las Juntas de freguesie, apoiórun-se financeiramente todos ls eibentos culturales de l Cunceilho. Apoiou-se i dibulgou-se la nuossa léngua i cultura mirandesa. Adquiriu-se l purmeiro camboio eilétrico de l paíç, dinamizador de la bisibilidade turística de l Cunceilho de Miranda de l Douro.

JN - L que l marcou mais pula positiba nestes anhos de geston outárquica? I pula negatiba?

AT - Pula positiba para alhá de la cuncretizaçon de las obras atrás referidas, fui la buona geston financeira. Este eisecutibo porjetou l cunceilho cumo punto turístico d'eiceléncia, promobiu d'eigual forma la buona qualidade de bida.

Stá amplantada ua reboluçon cultural ne l nuosso Cunceilho, promobida pula cámara municipal i acarinhada puls mirandeses.

Pula negatiba, apunto trés fatores: l'atraso de l QREN, que debie-se tener ampeçado an 2007 i solo stá l'ampeçar-se agora, tenendo atrasado todos ls ambestimentos planeados, cuncretamente la Quinta Pedagógica; Ua ouposiçon birtual que solo se lemitou a cumprir calendário, nunca dei eideias nin perpuostas, sendo un eilemiento passibo lemitando-se a aprobar todas las perpuostas apersentadas por este eisecutibo; la forma cumo l Partido Socialista i l Menistro de l Ansino Superior, Mariano Gago, tratou la nuossa cidade, todo fazendo para ancerrar l pólo ounibersitário, asfixiando-lo financeiramente cula reduçon de berbas, ansensibles a las rialidades de l'anterior nun fúrun mais qu'un cobeiro de todos ls pólos ounibersitários deste paíç. Eiqui tamien ua palabra a l'ouposiçon que nunca se colocou al lado de l'eisecutibo para participar i mober anfluéncias pa la cuntinidade de l'ansino superior an Miranda de l Douro.

JN - Lamenta la nun cuncretizaçon d'algun porjeto ó fui possible cuncretizar todo aqueilho que fui apersentado ne l porgrama eileitoral apresentado an 2005?

AT- Lamento la nó cuncretizaçon de dous grandes porjetos pa l Cunceilho de Miranda de l Douro. Purmeiro l Menistro de l'agricultura i dando cuntinidade a l'afronta als agricultores deste paíç nun se mostrou çponible para financiar l Matadouro de Miranda i, sin financiamento fui ampossible la sue cuncretizaçon. Poderie tener sido feito pulas trés cámaras de l praino Mirandés inda assi l mesmo nun fui possible chegar a acordo relatibamente a la sue localizaçon, porque l Município de Miranda fui antransigente, l Matadouro terá que ser oubrigatoriamente ne l nuosso Cunceilho.

L segundo porjeto nun cuncretizado fui la Quinta Pedagógica de Miranda de l Douro, a ser custruído an terrenos cedidos pula EDP de forma a promober la nuossa biodibersidade, las raças outótones i outras spécies pul fato de tener habido, cumo yá mencionei, un atraso ne l QREN.

“L'ouposiçon que nunca se colocou al lado de l'eisecutibo para participar i mober anfluéncias pa la cuntinidade de l'ansino superior an Miranda de l Douro”

JN - Quales las prioridades para este mandato?

AT - La purmeira prioridade son las pessonas, la sue ampregabilidade i l sou bien star i qualidade de bida, i la criaçon dun susidio de 500€ a todas las ampresas de l nuosso Cunceilho que a partir d'agora recruten ls funcionários pula purmeira beç ó qu'oumenten ls postos de trabalho. Dando cuntinidade a la política anterior, promober stágios profissionales a todos ls moços de l Cunceilho i cuntinar a apostar na formaçon i eiducaçon d'adultos.

Apostar na promoçon i dibulgaçon de la léngua i de la cultura mirandesa, l comércio tradicional, de las nuossas tradiçones, gastronomie, na qualidade de l'auga, an melhor salude, melhor agricultura, melhorar las relaçones cun Spanha de forma a promober l comércio transfronteiriço. Cuntinar a lutar pa la cuncretizaçon de l IC5 cun ligaçon la Spanha, nun zeistir de l'ansino superior an Miranda de l Douro i cuntinaçon de la rializaçon d'obras prementes, tales cumo ls arranjos ourbanísticos an to l cunceilho i arranjos ourbanísticos an todas las freguesies

JN - Ten algun porjeto an minte ne l que toca a la dibulgaçon de la léngua mirandesa?

AT - La léngua i cultura mirandesa ye i será siempre l'ex- líbris de l património cultural de Miranda de l Douro.

Queremos manté-la biba i dibulga-la. Apoiar ls scritores i las eidiçones an léngua mirandesa, potencializar l Centro de Studos António Marie Mourinho qu'an colaboraçon cun las scuolas cuncretizará cursos d'ampeçaçon i specializaçon na léngua mirandesa i cula publicaçon de libros / jornales/ rebistas an mirandés.

Cuntinar cula Sumana de la Cultura Mirandesa, çtacando-se l festibal de la Cançon an léngua mirandesa i ampeçar l porcesso cun outras anstituiçones cun bista a ua candidatura la património mundial.

JN - Inda ye possible salbar l pólo de la UTAD an Miranda de l Douro?

AT - Relembro que quien cuncretizou l'ansino superior an Miranda de l Douro fui este eisecutibo, nunca se furtando la sfuorços pa la sue cuncretizaçon. Hoije passa dies defíceles, mas cuntinamos determinados i ampenhados i an colaboraçon cula UTAD, IPB i Ounibersidades de Salamanca i Balladolid, ancontraremos ua soluçon adequada al ansino superior an Miranda de l Douro.

JN - Qu'ambestimentos stan prebistos pa la bila de Sendin?

AT - La bila de Sendin ne ls redadeiros anhos sofriu grandes melhoramentos ourbanísticos, mas pa l próssimo mandato pretende-se fazer la remodelaçon de la Piscina i zona ambolbente, Parque de Campismo, alteraçon de l PDM, dar cuntinidade al pólo andustrial, criar un centro de recolha de produtos de a tierra para comercializaçon i amplementaçon de l porjeto “Bida Moço”.

JN - Acradita que l IC5, por si solo, bai zamcrabar l cunceilho de Miranda. Nun serie útele prolongar esta bie até a la frunteira cun Spanha?

AT - Purmeiro ye fundamental i prioritário la ligaçon de l IC5 la Espanha. Claro que, por si solo, l IC5 trará ambestimento, zambolbimento, pessonas. Mas l Município de Miranda de l Douro terá oubrigatoriamente de criar dinámicas sustentadas para fazer deste Cunceilho la capital de l turismo stransmuntano, apostando ne l turismo de qualidade, l turismo de naturaleza, lenguístico, gastronómico, patrimonial, paisagístico, ambiental i, arriba de todo, cultural.

Fonte: Jornal Nordeste (06/10/2009)